సినీ నటుడు నాగార్జున కుమారుడు అక్కినేని అఖిల్, చిత్రకారిణి జైనబ్ రవ్జీలు ఈ ఏడాది మార్చిలో పెళ్లి చేసుకోబోతున్నట్లు నివేదికలు తెలిపాయి. ఈ జంట మార్చి 24న వారి స్నేహితులు, కుటుంబ సభ్యుల సమక్షంలో హైదరాబాద్‌లో వివాహం చేసుకోనున్నట్లు సమాచారం. కాగా శోభితా ధూళిపాళతో తన సోదరుడు నాగ చైతన్య వివాహానికి కొన్ని రోజుల ముందు నవంబర్ 2024లో జైనబ్‌తో అఖిల్ నిశ్చితార్థం చేసుకున్నాడు.

దిల్లీలో కొన్నాళ్ల క్రితం రామ్‌ లీలా మైదానం దగ్గర సంచుల్లో ఓ వ్యక్తి అవయవాలు దొరికాయి. ఒక సీసీ టీవీలో ఇద్దరు అనుమానాస్పదంగా కనిపించడం తప్ప మరే ఆధారం దొరకలేదు. ఆ ప్రాంతంలో వేలాది ఫోన్‌ నంబర్లను జల్లెడ పట్టిన పోలీసులు, అవయవాలు దొరకడానికి ముందు, తర్వాత 2 నంబర్లు స్విఛాఫ్‌ అయినట్లు గుర్తించారు. వాటిని ట్రేస్‌ చేసి విచారించగా తమను వేధిస్తున్న భర్తను కొడుకుతో కలిసి చంపినట్లు పూనమ్‌ అనే మహిళ ఒప్పుకుంది.

అఘోరాలు మరణించినప్పుడు వారి దేహాన్ని ఓ కర్రకు తలకిందులుగా కట్టి, పాదాలు పైకి ఉండేలా వేలాడదీస్తారు. 40 రోజుల పాటు ఆ శరీరాన్ని పురుగులు, పశుపక్ష్యాదులకు వదిలేస్తారు. ఆ సమయం పూర్తయ్యాక మిగిలిన శరీరాన్ని గంగానదిలో అర్పిస్తారు. తలను మాత్రం సేకరించి, ఆధ్యాత్మిక సాధన కోసం పుర్రెను వినియోగిస్తారు. నాగ సాధువుల మృతదేహాలను సైతం వారి కోరిక ప్రకారం 'జల సమాధి' లేదా 'భూ సమాధి' చేస్తారు. వారు పుర్రెను సేకరించరు.

ఛాంపియన్స్ ట్రోఫీ 2025 జట్టులో చోటు దక్కకపోవడంపై భారత T20I కెప్టెన్ సూర్యకుమార్ యాదవ్ తొలిసారి స్పందించాడు. “నాకు బాధ లేదు. నేను బాగా ఆడి ఉంటే, ఛాంపియన్స్ ట్రోఫీ జట్టులో ఉండేవాడిని. నేను బాగా ఆడలేదనే విషయాన్ని అంగీకరించడం ముఖ్యం. అర్హులకే ఛాంపియన్స్ ట్రోఫీ జట్టులో చోటు దక్కింది,” అని సూర్యకుమార్ యాదవ్‌ అన్నాడు. ఇంగ్లాండ్‌తో తొలి టీ20 మ్యాచ్‌కు ముందు అతడు ఈ వ్యాఖ్యలు చేశాడు.

కోల్‌కతాలోని ఈడెన్ గార్డెన్స్‌లో బుధవారం భారత్‌తో జరిగే తొలి టీ20కి ఇంగ్లాండ్ జట్టు తమ ప్లేయింగ్ ఎలెవెన్‌ను ప్రకటించింది. జోస్ బట్లర్ జట్టుకు నాయకత్వం వహిస్తుండగా, ఫిల్ సాల్ట్ వికెట్ కీపర్‌గా ఎంపికయ్యాడు. ఈ జట్టులో ఫాస్ట్ బౌలర్లు మార్క్‌వుడ్, జోఫ్రా ఆర్చర్ కూడా ఉన్నారు. బెన్ డకెట్ సాల్ట్‌తో కలిసి బ్యాటింగ్ ప్రారంభిస్తాడు. ఇంగ్లాండ్ తుది జట్టులో ఎక్కువమంది ఆల్‌రౌండర్లు ఉన్నారు.

జమ్మూలోని రాజౌరి జిల్లాలో 3 కుటుంబాలకు చెందిన 17 మంది మరణించిన తర్వాత సమీపంలోని ఒక మెట్ల బావిలో పురుగు మందుల ఆనవాళ్లు కనిపించాయని నివేదికలు తెలిపాయి. బాధితులు ఆ బావి నుంచి నీరు తాగి ఉంటారని అనుమానిస్తున్నారు. అయితే గ్రామంలో అంతుచిక్కని, మర్మమైన వ్యాధి ఏదీ లేదని, ఎలాంటి వైరస్, బ్యాక్టీరియా వ్యాప్తి చెందలేదని స్థానిక పరిపాలన యంత్రాంగం ప్రాథమికంగా ఓ నిర్ధారణకు వచ్చిందని తెలిసింది.

అమెరికా విదేశాంగ మంత్రి మార్కో రూబియో తన తొలి భేటీలో భారత విదేశాంగ మంత్రి జైశంకర్‌తో సమావేశమయ్యారు. ఈ సందర్భంగా భారత్‌తో ఆర్థిక సంబంధాలను మరింత మెరుగుపరచాలని డోనల్డ్ ట్రంప్‌ ప్రభుత్వం భావిస్తున్నట్లు రూబియో చెప్పారని ఒక ఉన్నతాధికారి తెలిపారు. అక్రమ వలసలకు సంబంధించిన వివాదాలను కూడా పరిష్కరించాలని ఆయన ఆకాంక్షించారు. క్వాడ్‌ విదేశాంగ మంత్రుల సమావేశానికి కూడా ఆ ఇద్దరు మంత్రులు హాజరయ్యారు.

జన్మతః వచ్చే పౌరసత్వం రద్దు చేస్తూ అమెరికా అధ్యక్షుడు డోనల్డ్‌ ట్రంప్ జారీ చేసిన ఎగ్జిక్యూటివ్‌ ఆర్డర్‌ను అడ్డుకునేందుకు ఆ దేశంలోని న్యూయార్క్, కాలిఫోర్నియా సహా 22 రాష్ట్రాల అటార్నీ జనరల్‌లు కోర్టులో దావా వేశారు. "ఈ ఆర్డర్ రాజ్యాంగ విరుద్ధం,” అని కాలిఫోర్నియా అటార్నీ జనరల్ రాబ్ బొంటా అన్నారు. ఈ చట్టం వలస వచ్చిన వారికి అమెరికా గడ్డపై పిల్లలు పుడితే, ఆ చిన్నారులకు సహజంగా పౌరసత్వం అందిస్తుంది.

తుర్కియేలోని ఓ ప్రముఖ స్కీ రిసార్ట్‌లోని 12 అంతస్తుల హోటల్‌లో మంగళవారం జరిగిన భారీ అగ్నిప్రమాదంలో 66 మంది మృతి చెందారు. ఈ ప్రమాదంలో మరో 51 మంది గాయపడ్డారని ఆ దేశ మంత్రి అలీ తెలిపారు. స్థానిక కాలమానం ప్రకారం తెల్లవారుజామున 3.30 గంటల ప్రాంతంలో మంటలు చెలరేగాయని, ఆ సమయంలో హోటల్‌లో 234 మంది అతిథులు ఉన్నారని అధికారులు తెలిపారు. భయంతో హోటల్ నుంచి దూకి కొందరు చనిపోయారని చెప్పారు.

అమెరికాలోని ఇండియానా రాష్ట్రంలో తన పదేళ్ల పెంపుడు కొడుకుపై కూర్చొని అతడిని చంపినందుకు 154 కిలోల బరువున్న 48 ఏళ్ల జెన్నిఫర్‌ లీ అనే మహిళకు కోర్టు ఆరేళ్ల జైలు శిక్ష విధించింది. గతేడాది ఏప్రిల్‌లో అల్లరి చేస్తున్నాడని జెన్నిఫర్‌ 5 నిమిషాల పాటు బాలుడిపై కూర్చోగా, అతని కదలికలు ఆగిపోయాయి. దీంతో ఆసుపత్రికి తీసుకెళ్లగా అప్పటికే ఊపిరాడక బాలుడు మరణించినట్లు వైద్యులు నిర్ధారించారు.

హెచ్1బీ వీసాని కొనసాగిస్తారా లేదా తొలగిస్తారా అనే చర్చపై అమెరికా అధ్యక్షుడు డోనల్డ్‌ ట్రంప్‌ స్పందించారు. ‘’ఈ అంశంపై నాకు రెండు వైపుల వాదనలూ నచ్చాయి. సమర్థవంతులైన వ్యక్తులు మన దేశంలోకి రావడాన్ని నేనూ ఇష్టపడతాను,’’ అని చెప్పారు. ‘’నేను హెచ్1బీ వీసాను నిలిపివేయాలని అనుకోవట్లేదు. ఇంజనీర్ల గురించి మాత్రమే మాట్లడటం లేదు. అన్ని స్థాయిల వ్యక్తులను దృష్టిలో ఉంచుకొని ఈ మాట చెబుతున్నా,’’ అని ఆయన తెలిపారు.

10 మందికి ఉండే శక్తి సీనియర్ నటుడు నరేశ్‌ ఒక్కరిలో ఉంటుందని ఆయన భార్య, నటి పవిత్ర చెప్పారు. నరేశ్‌ 65వ జన్మదిన వేడుకల్లో పవిత్ర మాట్లాడుతూ, ‘’ఆయన(నరేశ్‌) ఎనర్జీని తట్టుకోలేం. నేను రాత్రి అయితే త్వరగా అలసిపోతాను. ఆయన స్టాఫ్ కూడా అలసిపోతారు. మిగిలిన వర్క్ నువ్వే చూసుకో అని చెప్పేస్తాను. ఆయన మాత్రం అలసిపోరు,’’ అని ఆమె అన్నారు. నరేశ్‌కి బర్త్‌డే గిఫ్ట్‌గా షర్ట్ ఇచ్చానని తెలిపారు.

నటి రష్మిక బుధవారం శంషాబాద్ ఎయిర్‌పోర్టులో వీల్‌ఛైర్‌లో కనిపించారు. ప్రస్తుతం ఈ వీడియో వైరల్‌గా మారింది. ఇటీవల జిమ్‌లో వర్కౌట్లు చేస్తుండగా ఆమె కాలికి గాయమైంది. ఈ క్రమంలో తాజాగా కాలికి కట్టుతో రష్మిక కనిపించారు. ఆమె తన హిందీ చిత్రం ప్రచారంలో పాల్గొనడం కోసం ముంబై బయల్దేరినట్లు తెలుస్తోంది. కారులో ఎయిర్‌పోర్ట్‌కు చేరుకున్న రష్మిక తన టీమ్‌ సాయంతో వీల్‌ఛైర్‌లో విమానాశ్రయం లోపలికి వెళ్లారు.

హైదరాబాద్‌ సరూర్‌నగర్‌లో అనుమతి లేకుండా కిడ్నీ మార్పిడి సర్జరీలు చేస్తున్న అలకనంద ఆసుపత్రిపై పోలీసులు, అధికారులు దాడులు చేశారు. ఇతర రాష్ట్రాల నుంచి అమాయకులకు డబ్బు ఆశ చూపి ఈ సర్జరీలు చేస్తున్నట్లు వారు తెలిపారు. ఈ దాడుల్లో కిడ్నీ దాతలైన ఇద్దరు తమిళ మహిళలు, కర్ణాటకకు చెందిన ఇద్దరు గ్రహీతలను గుర్తించి వారిని గాంధీ ఆసుపత్రికి తరలించారు. అలకనంద ఆసుపత్రిని సీజ్‌ చేసి, వైద్యులను విచారిస్తున్నారు.

అంబేడ్కర్‌ కోనసీమ జిల్లా ముమ్మిడివరంలో ప్రేమ పేరుతో తమ కుమార్తెను వేధిస్తున్నాడని 10వ తరగతి బాలుడిపై ఆమె తండ్రి కత్తితో దాడి చేసినట్లు పోలీసులు తెలిపారు. ఇద్దరివి వేర్వేరు స్కూళ్లు కాగా, తమ కుటుంబంతో కలిసి చర్చికి వెళ్తున్న సమయంలో బాలికతో సదరు బాలుడు పరిచయం పెంచుకున్నాడు. తరచూ ఆమెతో మాట్లాడుతూ ఉండటంతో సహించలేని బాలిక తండ్రి కత్తితో దాడి చేసి పోలీసుల ఎదుట లొంగిపోయాడు.

హైదరాబాద్‌ గచ్చిబౌలిలో రోడ్డుపై వెళ్తున్న స్కూటీని మద్యం మత్తులో బెంజ్‌ కారులో వెళ్తున్న యువకులు ఢీకొట్టినట్లు పోలీసులు తెలిపారు. బాధితుడు ఫుట్‌పాత్‌పై పడిపోగా, ముందుకు వెళ్లిన నిందితులు మరో కారులో వెనక్కి వచ్చి "మా బెంజ్‌ కారుకే డ్యామేజ్‌ చేస్తావా" అని దూషిస్తూ అతడిని చితకబాదినట్లు వారు చెప్పారు. అక్కడే ఉన్నవారు వీడియో తీసి సోషల్‌ మీడియాలో పోస్ట్‌ చేయడంతో ఈ దృశ్యాలు ప్రస్తుతం వైరల్‌గా మారాయి.

దావోస్‌లో వరల్డ్ ఎకనామిక్‌ ఫోరమ్‌లో సీఎం రేవంత్ నేతృత్వంలోని తెలంగాణ ప్రభుత్వం తొలి ఒప్పందం కుదుర్చుకుంది. కామారెడ్డిలో పామాయిల్ తయారీ యూనిట్‌, రాష్ట్రంలో బాటిల్ క్యాప్‌ల తయారీ యూనిట్‌ను నెలకొల్పేందుకు యూనిలీవర్‌ ఒప్పుకుందని ప్రభుత్వం ప్రకటించింది. రాష్ట్రంలో యూనిలీవర్ విస్తరణకు అవసరమైన సహకారం అందిస్తామని, పామాయిల్ యూనిట్ ఏర్పాటుకు అవసరమైన స్థలాన్ని కేటాయిస్తామని సీఎం చెప్పారు.

విశాఖ జిల్లా భీమిలి మండలంలో పోలియోతో నడవలేని స్థితిలో ఉన్న 11 ఏళ్ల బాలికపై అత్యాచారం జరిగింది. ఆమె ఇంట్లో ఒంటరిగా ఉన్న వేళ పక్కింట్లో ఉండే 49 ఏళ్ల ఎల్ల‌య్య‌రెడ్డి రేప్‌ చేశాడని పోలీసులు తెలిపారు. మరోవైపు, విశాఖ మధురవాడలో 16 ఏళ్ల బాలికను ఆమెకు పరిచయస్తుడైన 30 ఏళ్ల సాయితేజ ఓ హోటల్‌లో రేప్‌ చేశాడని పోలీసులు చెప్పారు. బాలిక వెంట వచ్చిన ఆమె తమ్ముడు భోజనం తీసుకురావడానికి వెళ్లిన సమయంలో ఇది జరిగింది.

కర్నూలు జిల్లా మంత్రాలయం వేద పాఠశాలకు చెందిన విద్యార్థుల వాహనం కర్ణాటకలోని సింధనూరు సమీపంలో బోల్తా పడింది. ఈ ఘటనలో డ్రైవర్‌ శివ, ముగ్గురు విద్యార్థులు అభిలాష, హైవదన, సుజేంద్ర అక్కడికక్కడే మృతి చెందారు. శ్రీ నరహరి తీర్థుల ఆరాధానోత్సవాల కోసం మంత్రాలయం నుంచి 14 మంది వేద పాఠశాల విద్యార్థులు కర్ణాటకలోని హంపి క్షేత్రానికి తుపాను వాహనంలో వెళ్తుండగా ఈ ప్రమాదం జరిగింది.

కాలేయంలో కొవ్వు అధికంగా పేరుకుపోతే ఫ్యాటీ లివర్‌ వ్యాధి వస్తుంది. కొన్ని లక్షణాల ద్వారా దీనిని త్వరగా గుర్తించవచ్చు. రోజూ ఉదయం నుంచి రాత్రి వరకు తీవ్ర అలసటగా అనిపించడం, కడుపులో కుడి భాగంలో బరువుగా అనిపిస్తూ నొప్పి రావడం, అసాధారణంగా బరువు పెరిగి బెల్లీ ఫ్యాట్‌ రావడం ఈ వ్యాధి లక్షణాలు. అలాగే చర్మం నల్లబడటం, మొటిమలు ఎక్కువగా రావడం, వికారంగా అనిపిస్తూ ఆకలి లేకపోవడం వంటి లక్షణాలు కూడా కనిపిస్తాయి.

చిత్తాపూర్‌ - సికింద్రాబాద్‌ మధ్య నడుస్తోన్న చిత్తాపూర్ ఎక్స్‌ప్రెస్‌ ఆలస్యంగా వస్తోందని హైదరాబాద్‌లోని లింగంపల్లి రైల్వే స్టేషన్‌లోని ప్రయాణికులు ధర్నా చేశారు. ప్రతిరోజు ఉ.7.30కి రావాల్సిన రైలు 3-4 గంటలు ఆలస్యంగా వస్తోందని, దీంతో సకాలంలో ఆఫీస్‌లకు వెళ్లలేకపోతున్నామని తెలిపారు. కచ్చితమైన సమయవేళలు పాటించాలని డిమాండ్ చేశారు. స్టేషన్‌కు చేరుకున్న తర్వాత రైలును అడ్డుకొని పట్టాలపై ఆందోళనకు దిగారు.

తిరుమల శ్రీవారి సర్వదర్శనం భక్తులకు బుధవారం టోకెన్లు ఇవ్వకుండా, నేరుగా క్యూలైన్లలోకి అనుమతిస్తున్నారు. వైకుంఠ ద్వార దర్శనంలో స్వామివారిని దర్శించుకోలేని భక్తులు ప్రస్తుతం భారీగా తరలివస్తున్న నేపథ్యంలో సర్వ దర్శనం భక్తులను నేరుగా వైకుంఠం క్యూ కాంప్లెక్స్‌-2లోకి అనుమతిస్తున్నారు. ఈ నెల 23న తెల్లవారుజాము నుంచి ఏరోజుకారోజు సర్వదర్శనం టోకెన్ల పంపిణీని పునఃప్రారంభిస్తామని టీటీడీ ఓ ప్రకటనలో తెలిపింది.

ఇటీవల తాను కొనుగోలు చేసిన కొత్త రేంజ్ రోవర్ నెంబర్ కోసం భారత ఫాస్ట్ బౌలర్‌ మహమ్మద్ సిరాజ్ మంగళవారం హైదరాబాద్‌ టోలిచౌకిలోని ఆర్టీవో కార్యాలయానికి వచ్చారు. ఈ సందర్భంగా అతడితో ఫొటోలు దిగేందుకు ఫ్యాన్స్ ఆసక్తి చూపించారు. పని ముగించుకుని సిరాజ్‌ అక్కడి నుంచి ఇంటికి వెళ్లిపోయాడు. కాగా ఛాంపియన్స్ ట్రోఫీకి ఎంపిక చేసిన జట్టులో మహమ్మద్‌ సిరాజ్‌కు చోటు దక్కలేదు. ప్రస్తుత రంజీ సీజన్‌లో అతడు ఆడనున్నాడు.

తనను డిప్యూటీ సీఎం చేయాలని జరుగుతున్న చర్చపై ఏపీ మంత్రి నారా లోకేశ్‌ స్పందించారు. ‘’ప్రస్తుతం నాకు చేతి నిండా పని ఉంది. ప్రధానంగా నాకు అప్పగించిన విద్యా రంగంలో సంస్కరణలు తెచ్చి ఆంధ్రా మోడల్ కేజీ-పీజీ విద్యను అమలు చేయాలని అనుకుంటున్నాను,’’ అని తెలిపారు. సీఎం చంద్రబాబు ఇచ్చిన లక్ష్యాలను సాధించడమే తన ముందున్న కర్తవ్యమని, అందుకే ఇతర అంశాలపై తాను దృష్టి పెట్టే అవకాశం లేదని ఆయన చెప్పారు.

ఏపీలో గుర్తింపు పొందిన రాజకీయ పార్టీల జాబితాలో జనసేనను కేంద్ర ఎన్నికల సంఘం(ఈసీ) చేర్చింది. దీనిపై పార్టీ అధ్యక్షుడు పవన్‌ కల్యాణ్‌కు ఈసీ లేఖ రాసినట్లు JSP అధికారిక X ఖాతాలో పోస్ట్‌ చేసింది. సార్వత్రిక ఎన్నికల్లో పోటీ చేసిన 21 అసెంబ్లీ స్థానాలు, 2 లోక్‌సభ సీట్లలో 100% స్టైక్‌ రేట్‌తో విజయం సాధించడంతో ఈసీ తమ పార్టీని గుర్తించి, గాజు గ్లాస్‌ గుర్తును రిజర్వ్‌ చేసినట్లు పేర్కొంది.