కోళ్ల శరీరంలో జీవ గడియారం ఉంటుంది. దీనిని సిర్కాడియన్ రిథమ్ అంటారు. ఈ గడియారం వాటి శరీరాన్ని 24 గంటల చక్రంలో పని చేయమని సూచిస్తుంది. సూర్యోదయం సమయంలో కాంతిలో మార్పు వల్ల సిర్కాడియన్ రిథమ్ చాలా చురుగ్గా మారుతుంది. దాని నుంచి వచ్చే సంకేతం వల్లే తెల్లవారుజామున కోడిపుంజులు కూస్తాయట. అలాగే అవి పొద్దున్నే లైంగికంగా చురుకుగా ఉంటాయని, ఆడ కోళ్లను ఆకర్షించడానికి కూడా కూత వేస్తాయని చెబుతారు.

కొవ్వు, కండరాలు శరీరాన్ని వెచ్చగా ఉంచడంలో సహాయపడతాయని హార్వర్డ్ హెల్త్ వెబ్‌సైట్ తెలిపింది. ఉండాల్సిన బరువు కంటే తక్కువ ఉన్న వారికి ఇతరులతో పోలిస్తే ఎక్కువ చలి పుడుతుంది. సరైన ఆహారపు అలవాట్లు లేకపోవడం, హైపోథైరాయిడిజం, డీహైడ్రేషన్, రక్త ప్రసరణ సరిగ్గా జరగకపోవడం, ఎర్ర రక్త కణాల సంఖ్య తక్కువగా ఉండడం (రక్తహీనత) వల్ల కూడా కొంతమందికి ఎక్కువగా చలి వేస్తుందని హార్వర్డ్ హెల్త్‌ పేర్కొంది.

పాకిస్తాన్‌లో ఖైబర్ పఖ్తుంక్వాలోని అన్సార్ మీరా గ్రామస్తులు సొంతంగా రాసుకున్న 20 సూత్రాల రాజ్యాంగాన్ని అనుసరిస్తారు. వరకట్నం, గాలిలోకి కాల్పులు, విద్యార్థులు స్మార్ట్‌ఫోన్ల వాడకం వంటి వాటిని ఆ గ్రామ ప్రజలు నిషేధించారు. ఇక్కడ అమ్మాయి వివాహానికి గరిష్ఠంగా రూ.100 మాత్రమే పెళ్లి కానుకగా ఇస్తారు. పెళ్లికి వచ్చే అతిథులకు టీ, బిస్కెట్లతో మాత్రమే స్వాగతం చెబుతారు. ఇక్కడి మహిళలకు కూడా ఆస్తిలో వాటా ఉంది.

ప్రపంచంలోనే అత్యంత పొట్టి మహిళ జ్యోతి, ప్రపంచంలోనే అత్యంత పొడవైన మహిళ రుమేసా గెల్గిని మొదటిసారి కలుసుకున్నారు. ఈ ఇద్దరూ కలిసి, టీ తాగిన వీడియోను గిన్నిస్ వరల్డ్ రికార్డ్స్ షేర్‌ చేసింది. ఇందులో ఓ అధికారి వారికి ఐకాన్ సర్టిఫికేట్‌లను అందించినట్లు ఉంది. “మీరిద్దరూ అద్భుతంగా ఉన్నారు,” అని ఆ అధికారి జ్యోతి, రుమేసాలతో అన్నారు. నువ్వు చాలా అందంగా ఉన్నావని, రుమీసా జ్యోతితో చెప్పారు.

పెళ్లికి ఒప్పుకోలేదని తమిళనాడులోని తంజావూరులో రమణి అనే 26 ఏళ్ల టీచర్‌ను మదన్‌ అనే 30 ఏళ్ల వ్యక్తి ఓ ప్రభుత్వ పాఠశాల ఆవరణలో కత్తితో పొడిచి చంపాడు. నిందితుడిని పోలీసులు అదుపులోకి తీసుకుని విచారణ చేపట్టారు. తమ పెళ్లి గురించి చర్చించడానికి రమణి, మదన్ కుటుంబాలు ఇటీవల సమావేశమైనప్పటికీ, ఆమె ఆ ప్రతిపాదనకు ఒప్పుకోలేదని, ఆ కోపంతో మదన్‌ ఆమెను హత్య చేశాడని పోలీసుల విచారణలో వెల్లడైంది.

లంచం, మోసానికి పాల్పడినట్లు అదానీ గ్రూప్‌ ఛైర్మన్‌ గౌతమ్ అదానీపై న్యూయార్క్‌లో కేసు నమోదైంది. గౌతమ్‌ అదానీ, ఆయన బంధువు సాగర్ అదానీతో సహా మరికొందరు సౌరశక్తి సరఫరా ఒప్పందాలను పొందేందుకు భారత ప్రభుత్వ అధికారులకు సుమారు 265 మిలియన్‌ డాలర్లు లంచం ఇచ్చేందుకు ప్లాన్ చేశారనే ఆరోపణలున్నాయి. అమెరికన్‌ ఇన్వెస్టర్లను మోసం చేశారని, అధికారులకు లంచం ఇచ్చారని అదానీపై అభియోగాలు మోపారు.

ఖలీస్తానీ ఉగ్రవాది హర్‌దీప్‌ సింగ్‌ నిజ్జర్‌ హత్యకు ప్లాన్‌ చేసిన విషయం ప్రధాని మోదీకి ముందే తెలుసని కెనడాకు చెందిన ఓ వార్తా పత్రిక కథనం రాసుకొచ్చింది. దీన్ని భారత విదేశాంగ శాఖ తీవ్రంగా ఖండించింది. అలాంటి అర్థం లేని కథనాలను కొట్టిపారేస్తున్నామని గట్టిగా చెప్పింది. ఇలాంటి తప్పుడు ప్రచారాలు రెండు దేశాల మధ్య సంబంధాలను మరింత దెబ్బతిస్తాయని భారత విదేశాంగ శాఖ ప్రతినిధి రణధీర్‌ జైస్వాల్‌ పేర్కొన్నారు.

చిరుతను చంపి వండుకుని తిన్నారంటూ ఒడిశాలోని నౌపడా జిల్లాలో ఇద్దరు వ్యక్తులను అరెస్టు చేశారు. అడవిలో ఈ నెల 15న వేటగాళ్లు అడవి పందుల కోసం వేసిన ఉచ్చులో చిరుత చిక్కుకుందని, దీంతో దాన్ని చంపి మాంసాన్ని వండుకొని తిన్నారని అసిస్టెంట్‌ కన్జర్వేటర్‌ ఆఫ్‌ ఫారెస్ట్‌ ముస్తాఫా సలేహ తెలిపారు. నిందితుల ఇళ్లపై దాడి చేయగా చిరుతపులి చర్మం, తల, మిగిలిపోయిన మాంసాన్ని, ఇతర భాగాలను అధికారులు స్వాధీనం చేసుకున్నారు.

చిన్న వివాదంతో 20 ఏళ్ల అనాథ గిరిజన యువతిపై ఓ యువకుడు దాడి చేయడంతో పాటు ఆమె ముఖానికి మానవ మలం (పెంట)ను పూసి, దానిని నోటిలో వేసిన ఉదంతం ఒడిశాలోని బోలంగీర్ జిల్లాలో వెలుగుచూసింది. నిందితుడు బాధితురాలి పంట పొలాన్ని పాడు చేస్తూ ట్రాక్టర్‌ను తీసుకెళ్లాడని, దీనిపై ఆమె ప్రశ్నించడంతో అతను ఈ చర్యకు పాల్పడ్డాడని పోలీసులు తెలిపారు. నిందితుడు ప్రస్తుతం పరారీలో ఉన్నాడు.

ఉత్తరప్రదేశ్‌ కర్హల్‌ నియోజకవర్గంలో బుధవారం ఉప ఎన్నికల పోలింగ్‌ జరుగుతుండగా 23 ఏళ్ల యువతి మృతదేహం ఓ సంచిలో లభ్యమైంది. సమాజ్‌వాదీ పార్టీకి ఓటు వేయనని చెప్పినందుకే ఆమెపై అత్యాచారం చేసి చంపారని బాధితురాలి తల్లి ఆరోపించారు. "వారి పార్టీకి ఓటు వేయాలని ఎస్పీ నేతలు మమ్మల్ని కోరారు. మేం బీజేపీకి వేస్తామనగా, దీనికి పరిణామాలు ఎదుర్కోవాల్సి వస్తుందని మమ్మల్ని బెదిరించారు," అని ఆమె చెప్పారు.

సెంట్రల్ బోర్డ్ ఆఫ్ సెకండరీ ఎడ్యుకేషన్ (సీబీఎస్ఈ) బుధవారం 10, 12వ తరగతి విద్యార్థుల ఫైనల్‌ పరీక్షల షెడ్యూల్‌ను విడుదల చేసింది. దాని ప్రకారం, 10,12 తరగతుల పరీక్షలు ఫిబ్రవరి 15, 2025 నుంచి ప్రారంభం కానున్నాయి. తొలి సారిగా పరీక్షలు మొదలయ్యేందుకు 86 రోజుల ముందు తేదీలను విడుదల చేశామని సీబీఎస్‌ఈ తెలిపింది. మార్చి 18న ఈ పరీక్షలు పూర్తవుతాయని పేర్కొంది.

శివమ్ అనే 22 ఏళ్ల యువకుడు తన పెళ్లికి ఒక రోజు ముందు జరిగిన హల్దీ వేడుకలో డ్యాన్స్ చేస్తూ గుండెపోటుతో మరణించాడు. ఉత్తరప్రదేశ్‌లోని హాథ్రస్‌లో ఈ ఘటన జరిగింది. శివమ్ తన బంధువులతో కలిసి సంతోషంగా డ్యాన్స్ చేస్తున్న వీడియో వెలుగులోకి వచ్చింది. అతను డ్యాన్స్‌ చేసి అలిసిపోయి కుర్చీలో కూర్చున్న కాసేపటికే కుప్పకూలిపోయాడు. వెంటనే అతడిని ఆస్పత్రికి తరలించగా, అప్పటికే మృతి చెందినట్లు వైద్యులు ప్రకటించారు.

బిలియన్ డాలర్ల లంచం, మోసానికి పాల్పడినట్లు అదానీ గ్రూప్‌ ఛైర్మన్‌ గౌతమ్ అదానీపై న్యూయార్క్‌లో కేసు నమోదు కావడంతో గురువారం ప్రారంభ ట్రేడింగ్‌లో అదానీ గ్రూప్ కంపెనీల షేర్లు సుమారు రూ.2 లక్షల కోట్ల మార్కెట్ విలువను కోల్పోయాయి. అదానీ ఎంటర్‌ప్రైజెస్ 10%, అదానీ పోర్ట్స్ 20%, అదానీ టోటల్ గ్యాస్ 15%, అదానీ గ్రీన్ 17%, అదానీ పవర్ 13%, అదానీ ఎనర్జీ సొల్యూషన్స్ షేర్లు 20% పతనం అయ్యాయి.

భారత అధికారులకు గౌతమ్ అదానీ, ఆయన బంధువు సాగర్ అదానీ సహా మరికొందరు లంచం ఇవ్వజూపారని యూఎస్ డిపార్ట్‌మెంట్ ఆఫ్ జస్టిస్, యూఎస్ సెక్యూరిటీస్ అండ్ ఎక్స్ఛేంజ్ కమిషన్ చేసిన ఆరోపణలను అదానీ గ్రూప్ ఖండిస్తూ, అవన్నీ "నిరాధారం" అని పేర్కొంది. అవి నేరారోపణలు మాత్రమేనని, దోషులుగా రుజువయ్యే వరకు నిందితులను నిర్దోషులుగానే భావించాల్సి ఉంటుందని అదానీ గ్రూప్ తెలిపింది. న్యాయపరంగా ముందుకెళ్తామని చెప్పింది.

అదానీ గ్రూప్ స్టాక్స్ గురువారం పతనం అయ్యాయి. సోలార్ ఎనర్జీ కాంట్రాక్టులు పొందేందుకు భారత ప్రభుత్వ అధికారులకు $250 మిలియన్ (దాదాపు రూ. 2,100 కోట్లు) లంచంగా ఇవ్వజూపారన్న ఆరోపణలతో అదానీ గ్రూప్‌ సంస్థ ఛైర్మన్‌ గౌతమ్‌ అదానీపై అమెరికాలో కేసులు నమోదైన నేపథ్యంలో ఆ గ్రూప్‌ స్టాక్స్‌ పడిపోయాయి. అదానీ ఎంటర్‌ప్రైజెస్ షేర్లు 10%, అదానీ గ్రీన్ ఎనర్జీ స్టాక్ 17%, అదానీ ఎనర్జీ సొల్యూషన్స్ స్టాక్ 20% క్షీణించాయి.

సినీ నటుడు విజయ్ దేవరకొండ ఓ ఇంటర్వ్యూలో మాట్లాడుతూ తాను రిలేషన్‌షిప్‌లో ఉన్నట్లు వెల్లడించాడు. అలాగే గతంలో ఓ నటితో డేటింగ్ చేసినట్లు కూడా తెలిపాడు. రిలేషన్‌షిప్‌పై అడిగిన ప్రశ్నకు విజయ్‌ బదులిస్తూ, ''నేను సింగిల్‌గా ఉంటానని మీరు అనుకుంటున్నారా? నా వయసు 35," అని చెప్పాడు. నటి రష్మిక మందన్నతో విజయ్‌ ప్రేమలో ఉన్నట్లు కొన్నాళ్లుగా ప్రచారం జరుగుతోంది.

విడాకుల కేసు విచారణలో భాగంగా నటుడు ధనుష్‌, ఆయన సతీమణి ఐశ్వర్య రజనీకాంత్‌ తాజాగా చెన్నై ఫ్యామిలీ కోర్టు ఎదుట హాజరయ్యారు. తాము కలిసి ఉండాలనుకోవడం లేదని, విడిపోవాలని నిర్ణయించుకున్నామని వారు తెలిపారు. కోర్టు తుది తీర్పును ఈ నెల 27కు వాయిదా వేసింది. 2004లో వీరిద్దరూ వివాహం చేసుకున్నారు. 18 ఏళ్ల వైవాహిక బంధానికి ముగింపు పలుకుతున్నామంటూ వీరు 2022లో ప్రకటించారు.

పోలీసు కానిస్టేబుల్‌ ప్రాథమిక పరీక్షలో అర్హత సాధించి దేహదారుఢ్య పరీక్షల (పీఎంటీ, పీఈటీ)కు ఎంపికైన అభ్యర్థులు చేసుకునే స్టేజ్‌-2 దరఖాస్తు గడువును ఈ నెల 28 వరకు పోలీసు నియామక మండలి పొడిగించింది. గతంలో నిర్దేశించిన ఆఖరు తేదీ గురువారంతో ముగియనుండగా, గడువును పొడిగిస్తూ బుధవారం ప్రకటన విడుదల చేసింది. కాగా, ఈ ఏడాది డిసెంబరు చివరి వారంలో దేహదారుఢ్య పరీక్షలు నిర్వహించేందుకు ఏర్పాట్లు చేస్తున్నారు.

మధ్యాహ్న భోజనం వికటించి నారాయణపేట జిల్లా మాగనూరు హైస్కూల్‌కు చెందిన 15 మంది విద్యార్థులు మహబూబ్‌నగర్ జిల్లా ఆస్పత్రిలో చికిత్స పొందుతుండగా, గురువారం ఉదయం వారికి అల్పాహారంగా అందించిన ఉప్మాలో పురుగులు కనిపించాయి. దీంతో తినకుండా పడేశామని విద్యార్థులు చెప్పారు. తాము బయటి నుంచి ఆహారం తీసుకొస్తామన్నా వైద్యులు ఒప్పుకోలేదని విద్యార్థుల తల్లిదండ్రులు చెప్పారు.

నారాయణపేట జిల్లాలోని మాగనూరు హైస్కూల్లో మధ్యాహ్న భోజనం వికటించి 50 మందికి పైగా విద్యార్థులు అస్వస్థతకు గురైన ఘటనపై ముఖ్యమంత్రి రేవంత్‌ రెడ్డి స్పందించారు. బాధిత విద్యార్థులకు మెరుగైన వైద్యం అందించాలన్నారు. ఈ ఘటనపై విచారణ జరిపి, నివేదిక ఇవ్వాలని జిల్లా కలెక్టర్‌, సీఎంవో అధికారులను సీఎం ఆదేశించారు. బాధ్యులైన వారిపై తక్షణమే చర్యలు తీసుకోవాలన్నారు. పౌష్టికాహారం విషయంలో రాజీ పడేది లేదని చెప్పారు.

హైదరాబాద్ శివారు కీసర అవుటర్‌ రింగు రోడ్డు వద్ద బుధవారం లారీ ఢీకొని 35 ఏళ్ల ఏలేందర్‌ కాళ్లు నుజ్జునుజ్జు కాగా, తనను వెంటనే హాస్పిటల్‌కి తీసుకెళ్లమని అతను స్థానికులను వేడుకున్నాడు. ఏ ఒక్కరూ ముందుకు రాకుండా సెల్ఫీలు, వీడియోలు తీస్తూ ఉండిపోయారు. యాక్సిడెంట్ అయిన చాలాసేపటికి 108 అంబులెన్స్ వచ్చి అతన్ని ఆస్పత్రికి తరలించగా, తీవ్ర రక్తస్త్రావం కావటంతో అప్పటికే ఏలేందర్ చనిపోయాడని డాక్టర్లు తెలిపారు.

తెలంగాణ గ్రూప్-2 హాల్‌ టికెట్లను డిసెంబర్‌ 9 నుంచి డౌన్‌లోడ్‌ చేసుకునేందుకు టీజీపీఎస్సీ అవకాశం కల్పించింది. ఈ మేరకు గురువారం ప్రకటన విడుదల చేసింది. డిసెంబర్‌ 15, 16 తేదీల్లో జరగనున్న ఈ పరీక్షల్లో 4 పేపర్లు ఉండగా ఉదయం, మధ్యాహ్నం 2 సెషన్లలో వీటిని నిర్వహించనున్నారు. ఉదయం 10కి, మధ్యాహ్నం 3కు ఎగ్జాం ప్రారంభమవుతుంది. 783 పోస్టుల భర్తీ కోసం నిర్వహిస్తున్న ఈ పరీక్షకు 5.51లక్షల మంది దరఖాస్తు చేసుకున్నారు.

హైదరాబాద్‌ మాదాపూర్‌లోని మైండ్‌ స్పేస్‌ టవర్‌లో 13వ అంతస్తు నుంచి దూకి సాఫ్ట్‌వేర్‌ ఉద్యోగి ఆత్మహత్య చేసుకున్నాడని పోలీసులు తెలిపారు. మృతుడిని గుంటూరు జిల్లా నెమలికల్లుకు చెందిన 24 ఏళ్ల వంగా నవీన్‌ రెడ్డిగా గుర్తించారు. ఇతను హాస్టల్‌లో ఉంటూ, మైండ్ స్పేస్‌లోని ఎన్‌సీఆర్ వోయిక్స్ సంస్థలో పనిచేస్తున్నాడు. బుధవారం డ్యూటీకి వెళ్లిన అతను, రాత్రి 8 గంటలకు 13వ ఫ్లోర్‌ నుంచి కిందకు దూకాడని సమాచారం.

కర్నూలులోని డ్రెస్‌ సర్కిల్ షాపింగ్‌ మాల్‌ వద్ద ఓ పసివాడి ఒంటికి రంగుపూసి, గాంధీ వేషంతో భిక్షాటన చేయిస్తున్న వీడియో సోషల్‌ మీడియాలో వైరల్‌గా మారింది. ఎండలో బాలుడు కునికిపాట్లు పడుతున్న దృశ్యాలను ఓ వ్యక్తి వీడియో తీసి, కాపాడాలంటూ మంత్రి నారా లోకేశ్‌ను "ఎక్స్‌"లో కోరారు. బాలుడిని కొట్టి ఈ పని చేయిస్తున్నారని అతను పేర్కొన్నాడు. దీనిపై స్పందించిన మంత్రి, బాలుడిని సంరక్షించాలని అధికారులను ఆదేశించారు.

ప్రధాని మోదీ నిర్వహిస్తున్న మన్‌ కీ బాత్‌ తరహాలోనే ఏపీలో సీఎం చంద్రబాబు కూడా ప్రజలతో నేరుగా మాట్లాడనున్నారు. సంక్రాంతి నుంచి ఈ కార్యక్రమం ప్రారంభమయ్యే అవకాశం ఉంది. ప్రస్తుతం దీనిపై చర్చలు జరుగుతున్నాయి. ఆయన హయాంలోనే 1995-2004 మధ్య ‘డయల్‌ యువర్‌ సీఎం’ నిర్వహించారు. త్వరలోనే ప్రజలతో ముఖాముఖి సమావేశాలు నిర్వహించనున్నట్లు బుధవారం అసెంబ్లీ వేదికగా చంద్రబాబు ప్రకటించారు.