చెప్పులో దూరిన రక్తపింజర పాము పిల్ల కాటు వేయడంతో బెంగళూరులో TCS ఉద్యోగి 41 ఏళ్ల ప్రకాశ్ మృతి చెందాడు. ప్రకాశ్‌ పనిమీద బయటికెళ్లి వచ్చి గదిలో నిద్రపోయాడు. అయితే అతడి చెప్పులో పాము ఉన్నట్లు కుటుంబ సభ్యులు గంట తర్వాత గమనించారు. ఆపై రూమ్‌కు వెళ్లి చూడగా, ప్రకాశ్‌ నోట్లో నుంచి నురగ వచ్చి చనిపోయినట్లు కనిపించాడు. 2016లో జరిగిన రోడ్డు ప్రమాదంలో ప్రకాశ్ కాలు స్పర్శ కోల్పోవడంతో, పాము కాటేసినా గుర్తించలేదు.

ఉత్తరప్రదేశ్‌ అలీఘర్‌లో 7వ తరగతి విద్యార్థినిపై లైంగిక వేధింపులకు పాల్పడి, ఆమెను పెళ్లి చేసుకోవాలని ఉందని ప్రేమలేఖ రాసిన ప్రభుత్వ పాఠశాల ప్రిన్సిపల్‌ను పోలీసులు అరెస్టు చేశారు. “సార్‌, నా ప్రైవేట్ పార్ట్స్ తాకాడు. నన్ను పెళ్లి చేసుకోవాలని ఉందని చెప్పాడు. ఈ విషయం ఎవరికైనా చెబితే పరీక్షలో ఫెయిల్ చేస్తానన్నాడు,” అని సదరు బాలిక తల్లికి చెప్పింది. 50 ఏళ్ల ప్రిన్సిపల్‌పై పోక్సో కింద కేసు నమోదు చేశారు.

మంచు విష్ణు ప్రధాన పాత్రలో తెరకెక్కిన ‘కన్నప్ప’ ఈ నెల 4 నుంచి ‘అమెజాన్‌ ప్రైమ్‌ వీడియో’లో స్ట్రీమింగ్‌ కానుంది. ఈ విషయాన్ని విష్ణు ప్రకటించారు. ముకేశ్‌ కుమార్‌ సింగ్‌ దర్శకత్వం వహించిన ఈ సినిమా థియేటర్లలో జూన్‌ 27న విడుదలైంది. ఇందులో ప్రభాస్‌, మోహన్‌లాల్‌, అక్షయ్‌కుమార్‌ లాంటి అగ్ర నటులు కీలక పాత్రల్లో ఆకట్టుకున్నారు. 'నాస్తికుడు, గొప్ప శివ భక్తుడిగా ఎలా మారిపోయాడు' అనే కథతో కన్నప్ప తెరకెక్కింది.

భూపాలపల్లి జిల్లా మేడిపల్లి అటవీ ప్రాంతంలో ఇటీవల 22 ఏళ్ల వర్షిణి మృతదేహం లభ్యమైన కేసులో ఆమె తల్లి కవిత సహా ఏడుగురిని పోలీసులు అదుపులోకి తీసుకున్నారు. చిట్యాల మండలం ఒడితలకు చెందిన కవితకు 25 ఏళ్ల యువకుడితో వివాహేతర బంధం ఉందని తేలింది. పక్షవాతంతో బాధపడుతున్న తన భర్తను 2 నెలల క్రితం ప్రియుడితో కలిసి కవిత చంపిందని ప్రాథమిక సమాచారం. ఈ విషయం వర్షిణికి తెలియడంతో ఆమెను సుపారీ ఇచ్చి చంపించినట్టు తెలిసింది.

ముఖ్యమంత్రిగా చంద్రబాబు తొలిసారి ప్రమాణం చేసి నేటికి 30 ఏళ్లు పూర్తయిన సందర్భంగా డిప్యూటీ సీఎం పవన్ కల్యాణ్‌ శుభాకాంక్షలు తెలిపారు. పాలనాదక్షతతో ఆయన చేపట్టిన కార్యక్రమాలు, సంస్కరణలు తెలుగు రాష్ట్రాల అభివృద్ధిని పరుగులు పెట్టించాయని ప్రశంసించారు. తెలుగు రాష్ట్రాల అభివృద్ధిలో సీఎం చంద్రబాబు ముద్ర చిరస్మరణీయమన్నారు. హైదరాబాద్‌ను ఐటీ రంగానికి కేరాఫ్ అడ్రస్‌గా మార్చిన ఘనత చంద్రబాబుదేనని పేర్కొన్నారు.

మాజీ సీఎం కేసీఆర్‌ పక్కనున్న కొందరు చేసిన పని వల్లే ఆయనకు చెడ్డపేరు వచ్చిందని తెలంగాణ జాగృతి అధ్యక్షురాలు, BRS MLC కవిత ఆరోపించారు. అందులో ఐదేళ్లపాటు ఇరిగేషన్‌ శాఖ మంత్రిగా ఉన్న హరీశ్‌రావు పాత్ర లేదా? అని ప్రశ్నించారు. మాజీ ఎంపీ సంతోష్‌, హరీశ్‌రావు, మేఘా ఇంజినీరింగ్‌ వల్లే కేసీఆర్‌కు చెడ్డపేరు వచ్చిందని చెప్పారు. కేసీఆర్‌ జనం కోసం పని చేస్తే.. వాళ్లు ఆస్తుల పెంపుకోసం పని చేశారని ఆరోపించారు.

భూకంపంతో అతలాకుతలమైన ఆఫ్ఘానిస్థాన్‌కు సహాయంగా భారత్‌ ఆహార పదార్థాలను పంపినట్లు విదేశాంగ మంత్రి ఎస్.జైశంకర్ X లో తెలిపారు. "భారత్‌ నుంచి కుటుంబాలు నివాసం ఉండగలిగే వెయ్యి టెంట్లు, 15 టన్నుల ఆహార పదార్థాలు పంపాం" అని చెప్పారు. రాబోయే రోజుల్లో భారత్‌ నుంచి మరిన్ని సహాయ సామగ్రిని పంపిస్తామని వెల్లడించారు.

గుండెపోటు నివారణలో, ప్రధానంగా రక్తస్రావ ప్రమాదం ఎక్కువగా ఉన్న రోగుల్లో ఆస్పిరిన్‌ కంటే క్లోపిడోగ్రెల్ మరింత ప్రభావవంతంగా, సురక్షితంగా ఉంటుందని ఇటీవలి అధ్యయనంలో తేలింది. గుండె ఆరోగ్యానికి ఆస్పిరిన్‌ చాలా కాలంగా ప్రమాణంగా ఉంది. అయితే హృదయ సంబంధ ఘటనలను తగ్గించడంలో క్లోపిడోగ్రెల్ మంచి ప్రత్యామ్నాయ మెడిసిన్‌గా ఆశాజనకంగా ఉందని వైద్యులు గుర్తించినట్లు అధ్యయనం వెల్లడించింది.

సోమవారం MCX సూచీలో 24 క్యారెట్ల 10 గ్రాముల బంగారం ధర రూ. లక్షా 5,937కు చేరింది. ఇప్పటివరకు ఇదే ఆల్‌ టైం గరిష్ఠమని నివేదికలు తెలిపాయి. అదే సమయంలో ప్రపంచ మార్కెట్‌లో బంగారం 4 నెలల గరిష్ఠానికి చేరుకుంది. 14 ఏళ్లలో మొదటిసారిగా వెండి ఔన్సుకు 40 డాలర్లకు పైగా పెరిగింది. బంగారం ధరలో ఈ ఏడాది ఇప్పటివరకు రూ.28,630 పెరుగుదల నమోదైంది.

పుణె నుంచి దిల్లీకి వెళ్తున్న స్పైస్‌ జెట్ విమానం సోమవారం సాంకేతిక లోపం కారణంగా బయల్దేరిన విమానాశ్రయానికి తిరిగి వెళ్లిందని నివేదికలు తెలిపాయి. "దిల్లీకి టేకాఫ్ అయిన గంట అనంతరం పూర్తి అత్యవసర పరిస్థితుల్లో విమానం తిరిగి దిగింది" అని విమానాశ్రయ వర్గాలు వెల్లడించాయి. విమానం సురక్షితంగా ల్యాండ్ అయిందని, ప్రయాణికులను ఎలాంటి ప్రమాదం లేకుండా దింపినట్లు స్పైస్‌జెట్ ఒక ప్రకటన విడుదల చేసింది.

వెనిజువెలా సమీపంలో 3 ఏజిస్‌ యుద్ధ నౌకలు, 4 వేలమంది సైనికులను మోహరించింది. అధ్యక్షుడు నికోలస్ మదురోపై 50 మిలియన్ డాలర్ల(రూ.439 కోట్లు) రివార్డు ప్రకటించిన తర్వాత ఈ చర్యలు చేపట్టింది. కార్టెల్ డి లాస్ సోల్స్‌కు నాయకత్వం వహించడం, ఫెంటానిల్-లేస్డ్ డ్రగ్స్‌ను అమెరికాలోకి అక్రమంగా రవాణా చేయడం వంటి ఆరోపణలు ఎదుర్కొంటున్న మదురో, ఈ చర్యను చట్టవిరుద్ధంగా ప్రభుత్వాన్ని మార్చే ప్రయత్నమని ఖండించారు.

ఆదివారం చైనాలో జరిగిన SCO శిఖరాగ్ర సమావేశంలో ప్రధానమంత్రి నరేంద్ర మోదీ, టర్కీ అధ్యక్షుడు రెసెప్ తయ్యిప్ ఎర్డోగన్‌తో కరచాలనం చేసి, వీపు తట్టి అభినందించారు. ఆపరేషన్ సిందూర్ సందర్భంగా టర్కీ తయారుచేసిన డ్రోన్లను పాకిస్థాన్‌ సరఫరా చేసి, మద్దతు ఇచ్చిన అనంతరం దేశాల మధ్య సంబంధాలు దెబ్బతిన్న అనంతరం ఈ సంభాషణ జరిగింది. ఈ నేపథ్యంలో భారత్‌లో టర్కీ వస్తుసేవలపై అనధికారిక బహిష్కరణ జరిగింది.

రష్యా చమురు కొనుగోలుపై కేంద్ర మంత్రి హర్దీప్ సింగ్ పూరి స్పందించారు. భారత్‌ ఎటువంటి నియమాలను ఉల్లంఘించలేదని, బదులుగా తమ ఇంధన వాణిజ్యం ప్రపంచ మార్కెట్లను స్థిరంగా ఉంచేందుకు సహాయపడిందని అన్నారు. భారత్‌లోని బ్రాహ్మణులు రష్యా చమురు కొనుగోలు చేయడం ద్వారా లాభాలు ఆర్జిస్తున్నారని అమెరికా అధ్యక్షుడు డోనల్డ్ ట్రంప్ సలహాదారు పీటర్ నవారో ఆరోపించారు.

ఉపాధ్యక్ష పదవికి రాజీనామా చేసిన నెల రోజుల అనంతరం జగదీప్ ధన్‌ఖడ్‌ సోమవారం తన అధికారిక నివాసాన్ని ఖాళీ చేసి దక్షిణ దిల్లీలోని ఛత్తర్‌పూర్ ప్రాంతంలోని ఒక ప్రైవేట్ ఫామ్‌హౌస్‌కు మారారు. ధన్‌ఖడ్‌కు టైప్-8 బంగ్లా కేటాయించే వరకు INLD నాయకుడు అభయ్ చౌతాలా యాజమాన్యంలోని ఫామ్‌హౌస్‌లో ఉండనున్నారు. కాగా ఆయన బంగ్లా సిద్ధం అయ్యేందుకు 3 నెలలు పడుతుంది.

ప్రధాని నరేంద్ర మోదీ, రష్యా అధ్యక్షుడు వ్లాదిమిర్ పుతిన్ ఆయుధ రక్షణ వ్యవస్థ కలిగిన లిమోజిన్ ఆరస్ సెనాట్‌ కారులో ప్రయాణించారు. కదిలే కోటగా పిలిచే ఈ కారు సెకన్లలో 0-100 కి.మీ వేగాన్ని అందుకోగలదు. గరిష్ఠంగా 249 కి.మీ వేగంతో ప్రయాణించే ఈ కారు 4.4-లీటర్ ట్విన్-టర్బోచార్జ్‌డ్‌ V8 ఇంజిన్, 598-హార్స్‌పవర్, 880 Nm టార్క్‌ను ఉత్పత్తి చేస్తుంది. సాధారణ ప్రజానీకానికి అమ్మే వేరియంట్‌ ధర రూ.2 కోట్లని సమాచారం.

రష్యా చమురు నుంచి బ్రాహ్మణులు లాభపడుతున్నారనే అమెరికా వాణిజ్య సలహాదారు పీటర్ నవారో వ్యాఖ్యలపై కాంగ్రెస్ నేత పవన్ ఖేరా స్పందించారు. అమెరికా "ఇలాంటి నిరాధారమైన ప్రకటనలు" చేయకూడదని అన్నారు. నవారో వ్యాఖ్యలు అమెరికాలో భారత్‌ గురించి కథనాలను ఎవరు నియంత్రిస్తారో చూపిస్తున్నాయని భారత ఆర్థికవేత్త, ప్రధాని మోదీ ఆర్థిక సలహా మండలి సభ్యుడు సంజీవ్ సన్యాల్ అభిప్రాయపడ్డారు.

ఆగస్టు 19న, నేషనల్ బోర్డ్ ఫర్ వైల్డ్ లైఫ్ పశ్చిమ బెంగాల్‌లోని సుందర్‌బన్స్ టైగర్ రిజర్వ్‌ 1,044.68 చదరపు కి.మీ విస్తరణకు ఆమోదం తెలిపింది. దీంతో దాని మొత్తం వైశాల్యం 3,629.57 చదరపు కి.మీకి చేరుకుంది. ప్రస్తుతం 7వ అతిపెద్ద టైగర్‌ రిజర్వ్‌గా ఉన్న సుందర్బన్స్‌ ఈ నిర్ణయంతో రెండో స్థానానికి చేరనుంది. కాగా, ఏపీలోని నాగార్జునసాగర్-శ్రీశైలం పులుల అభయారణ్యం దేశంలోనే అతిపెద్ద టైగర్‌ రిజర్వ్‌గా ఉంది.

భారత్‌, చైనా, మెక్సికో, బ్రెజిల్ వంటి వీసా మినహాయింపు లేని దేశాలకు అమెరికా 250 డాలర్ల(రూ.22వేలు) "వీసా సమగ్రత రుసుము"ను ప్రవేశపెట్టింది. దీంతో మొత్తం వీసా ఖర్చులు 442 డాలర్లకు(రూ.40వేలు) పెరిగాయి. అక్టోబర్‌ నుంచి ఈ ఫీజులు అమల్లోకి రానున్నాయి. కాగా, జూలై 2025లో అమెరికాకు ప్రయాణం 3.1% తగ్గగా, గతంలో వృద్ధి చెందుతున్న మార్కెట్లుగా ఉన్న మధ్య, దక్షిణ అమెరికా తీవ్రంగా దెబ్బతినే అవకాశం ఉంది.

గిన్నిస్ వరల్డ్ రికార్డ్స్ కెనడియన్ కంపెనీ జిమ్ ప్యాటిసన్ గ్రూప్ యాజమాన్యంలో ఉంది. దీని ప్రధాన కార్యాలయం లండన్‌లో ఉంటుంది. న్యూయార్క్, టోక్యో, దుబాయ్‌లల్లో కార్యాలయాలు ఉన్నాయి. దీనికి పుస్తక అమ్మకాలు, టీవీ కార్యక్రమాలు, బ్రాండ్ సహకారాలు, లైవ్‌ ప్రోగ్రాంల ద్వారా డబ్బును ఆర్జిస్తోంది. దీనితో పాటు, కంపెనీలు/సంస్థలు రికార్డులను నమోదు చేసేందుకు రుసుము చెల్లిస్తాయి. ఇది దాని ఆదాయానికి ప్రధాన వనరు.

నయం చేయలేని వ్యాధులు, వృద్ధాప్యం లేదా వైకల్యాలతో బాధపడుతున్న ఖైదీలను గుర్తించేందుకు రాష్ట్ర వ్యాప్త సర్వేకు ఉత్తర్‌ప్రదేశ్‌ ప్రభుత్వం ఆదేశాలు జారీ చేసింది. మహిళలు, నిస్సహాయ ఖైదీలకు కూడా ఇందులో ప్రాధాన్యత ఇవ్వనున్నారు. ఉత్తరప్రదేశ్ జైళ్లలోని అర్హులైన ఖైదీలను కారుణ్య విడుదల ద్వారా బయటికి తీసుకురావడమే లక్ష్యంగా ఈ చర్యలు చేపట్టారు.

మరాఠా రిజర్వేషన్లపై ముంబైలో జరుగుతున్న నిరసనను బాంబే హైకోర్టు తప్పు పట్టింది. ఇది అన్ని షరతులను ఉల్లంఘించిందని పేర్కొంది. "మొత్తం నగరం స్తంభించింది, ముంబైలోని ప్రధాన ప్రదేశాలను నిరసనకారులు చుట్టుముట్టారు" అని ఆందోళనను సవాలు చేస్తూ దాఖలైన పిటిషన్‌ విచారణ సందర్భంగా కోర్టు వ్యాఖ్యానించింది. 5వేల మందికి అనుమతి ఇస్తే, కానీ ఆజాద్ మైదాన్ బయట ఎక్కువ మంది గుమిగూడారని కోర్టు వెల్లడించింది.

బెంగళూరులోని సెంటర్ ఆఫ్ ఎక్సలెన్స్‌లో ఫిట్‌నెస్ పరీక్షకు ముందు టీమిండియా వన్డే కెప్టెన్ రోహిత్ శర్మ దాదాపు 20 కిలోల బరువు తగ్గాడని నివేదికలు తెలిపాయి. బరువు తగ్గడానికి ముందు, బరువు తగ్గిన తర్వాత రోహిత్ ఎలా ఉన్నాడో చూపే ఫొటోలు సోషల్ మీడియాలో వైరల్‌గా మారాయి. కొత్తగా తీసుకొచ్చిన బ్రాంకో టెస్ట్‌లో రోహిత్‌ పాసయ్యాడని నివేదికలు తెలిపాయి.

ప్రపంచంలో అత్యంత అల్లకల్లోలంగా ఉన్న దేశం రష్యా అని గ్లోబల్ పీస్ ఇండెక్స్ 2025 తెలిపింది. ఇది ఈ జాబితాలో చివరన 163వ స్థానంలో ఉంది. రష్యాకు పైనున్న దేశాల్లో ఉక్రెయిన్, సూడాన్, కాంగో, యెమెన్, ఆఫ్ఘనిస్తాన్, సిరియా, దక్షిణ సూడాన్, ఇజ్రాయెల్, మాలి, మయన్మార్ ఉన్నాయి. బ్రిటన్ 30వ స్థానంలో ఉండగా, ఫ్రాన్స్ 74వ స్థానంలో, అమెరికా 128వ స్థానంలో, ఇరాన్ 142వ స్థానంలో, టర్కీ 146వ స్థానంలో నిలిచాయి.

ఐపీఎల్ మాజీ ఛైర్మన్ లలిత్ మోడీ 17 ఏళ్ల తర్వాత శ్రీశాంత్‌ను చెంపదెబ్బ కొట్టిన వీడియోను విడుదల చేయడంపై భారత మాజీ స్పిన్నర్ హర్భజన్ సింగ్ స్పందించారు. "నేను చాలా సందర్భాల్లో చెప్పాను, నేను తప్పు చేశాను, మనుషులు తప్పులు చేస్తారు, నేను కూడా ఒకటి చేశాను" అని ఆయన అన్నారు. "వీడియో లీక్ అయిన విధానం తప్పు, అది జరిగి ఉండకూడదు, దాని వెనక వారికి స్వార్థపూరిత ఉద్దేశ్యం ఉండవచ్చు" అని హర్భజన్ అభిప్రాయపడ్డారు.

చైనాలోని ఆరస్‌లో రష్యా అధ్యక్షుడు వ్లాదిమిర్ పుతిన్‌తో కలిసి ప్రయాణిస్తున్న చిత్రాన్ని ప్రధాని నరేంద్ర మోదీ షేర్‌ చేశారు. "ఆయనతో సంభాషణ ఎల్లప్పుడూ అంతర్‌దృష్టిని కలిగి ఉంటుంది" అని పేర్కొన్నారు. తాము SCO సమావేశ వేదిక నుంచి తమ ద్వైపాక్షిక సమావేశ వేదికకు ప్రయాణించినట్లు చెప్పారు. ఇద్దరు నాయకులు కారులో 45 నిమిషాలు మాట్లాడుకున్నట్లు నివేదికలు తెలిపాయి.